PRESENTACIÓN DO LIBRO DE R. CARIDE "O CAMIÑO DA ESTADEA"

Este vindeiro venres 25 de novembro, ás 20:00 horas en Exposalnés, terá lugar a presentación do novo libro de Ramón Caride "O camiño da Estadea". Durante o acto intervirán o propio autor, así como o editor Manuel Bragado, a historiadora Maribel Iglesias, o historiador Manuel Núñez, e o Concelleiro de Cultura Víctor Caamaño.

Unha videochamada ía mudar a vida de Said e Sheila para sempre. Levaban semanas sen intercambiar impresións des que Said se instalara en Suíza, onde vivía con Irina e traballaba nun laboratorio de investigación. Os tres amigos foran convidados a participar na inauguración dun gran centro comercial en Bambari, na África Central, o maior complexo do continente, un acontecemento global ao que iría moita xente famosa de diferentes ámbitos. Todo o que pasou logo foi algo raro, que non era o esperado nin remotamente, para unha viaxe de lecer, algo que non lles cadraba e que os obrigará a comprometerse e asumir riscos.O camiño da Estadea é a aventura final de Sheila e Said, culminando a serie futurista de temática ecolóxica iniciada hai dúas décadas con Perigo vexetal, unha saga que xa ten catro entregas anteriores publicadas na colección Merlín de Xerais.