NOVA ESTAFA EN INTERNET

Está en marcha unha estafa nova na mensaxería instantánea. Existe na internet unha aplicación denominada WhatsApp ouro, un servizo que en realidade non existe, e que se promove como unha nova versión do popular chat pero cun custo de 36 euros mensuais. O usuario que se dá de alta tan só recibirá mensaxes multimedia polos que pagará un prezo.

A mensaxería instantánea é un dos grandes negocios da telefonía e a unha das aplicacións máis populares, á de WhatsApp, saíulle un competidor nas redes sociais. Trátase dunha fraude da que alertan tanto a Garda Civil coma a Policía Nacional a través dos seus respectivos perfís oficiais na internet. 

En realidade, WhatsApp Ouro ofrece un servizo que non existe e que ten un custo importante para os usuarios que se dean de alta. Aparece nas redes sociais, Facebook e Twitter baixo a suxestiva lenda de conseguir un WhatsApp diferente para pasar dun servizo común a outro completamente interesante. Un calote dos moitos que arestora existen na internet.

Dándose de alta o usuario subscríbese a un servizo de mensaxería instantánea con primas que cobrará 1,45 € por cada mensaxe que lle envíen ata un máximo de 36,25 € mensuais. A Policía e a Garda Civil alertan os usuarios que rexeiten este tipo de actualizacións no móbil. As forzas de seguridade xa comezaron a recibir as primeiras denuncias pola estafa desde o sur de España.