A BASQUE CULINARY CENTER VISITA O SALNÉS E PONTEVEDRA

100 alumnos e 10 profesores do primeiro curso do Basque Culinary Center visitan desde hoxe e ata o vindeiro xoves a provincia de Pontevedra para afondar no coñecemento da gastronomía e a cultura culinaria das Rías Baixas.

No marco desta actividade, foron recibidos esta mañá no Pazo provincial pola deputada Ana Isabel Vázquez Reboredo, que agradeceu a visita e animou ós "futuros cociñeiros" a ter moi presentes os produtos desta provincia no seu labor profesional.
Pontevedra é xa un destino tradicional no programa de actividades do Basque Culinary Center (a primeira e única Facultade de Ciencias Gastronómicas de España), que organiza estas viaxes de aprendizaxe como unha forma de completar a formación do seu alumnado.

Aínda que os alumnos xa tiveron contacto cos produtos galegos nas clases teóricas e nas prácticas que realizan na facultade, esta visita proponse como unha ocasión excepcional para coñecer directamente non só os produtos das Rías Baixas senón todo o proceso de produción e elaboración.

Así, durante a xornada de hoxe visitarán unha batea da Denominación de Orixe Protexida Mexillón de Galicia, xantarán no Centro Vacacional da Lanzada e  pola tarde achegaranse ata o Instituto Galego de Formación de Acuicultura.

A visita continuará mañá mércores cun percorrido por varias adegas da Denominación de Orixe Rías Baixas de Arousa e O Condado-A Paradanta; e pecharán a súa estadía en Pontevedra o xoves, día no que continuarán con visitas a adegas, así como á lonxa de Cambados e a unha cetárea. Despediranse cun showcooking na adega Lagar de Pintos.