LOUZÁN IRA AO PARLAMENTO A PRESENTAR O PRESUPOSTO DA DEPUTACIÓN

O presidente da Deputación de Pontevedra, Rafael Louzán, comparecerá no Parlamento para expoñer as principais liñas do orzamento que a Administración provincial prepara para o 2014, que ascenderá a 146 millóns de euros.

Aínda que non están pechados, a Deputación traballa na elaboración duns orzamentos centrados en dúas liñas básicas de actuación: o investimento en política social e de emprego, e a construción e mellora de infraestruturas prioritarias fundamentais para mellorar a calidade de vida das persoas.

O obxectivo é que, nun momento aínda de dificultades (as contas redúcense nun 1,7% con respecto a 2013), a Deputación de Pontevedra se centre en dar cobertura ás necesidades básicas dos concellos; promoverase a prestación conxunta de servizos, para o cal se destinarán uns 15 millóns de euros, e garantiranse os investimentos, con preto de 20 millóns de euros. Así mesmo, a institución provincial centrarase na política social e na promoción do emprego, con outros 20 millóns de euros do orzamento.

14 millóns de euros dirixiranse á promoción da cultura, á educación e ó Museo de Pontevedra; preto de 20 millóns á conservación e ó mantemento das estradas; e 2,4 millóns a impulsar un dos sectores clave da economía pontevedresa, o turismo.

Estas e outras liñas de actuación serán as que expoña o presidente da Deputación, Rafael Louzán, ante os membros da Comisión de Economía, Facenda e Orzamentos. Louzán será o primeiro dos catro presidentes en comparecer; seguiranlle os de Ourense, A Coruña e Lugo.