O ENCERRO DOS AFECTADOS POLAS PREFERNTES EN SANXENXO PODERÍASE AMPLIAR A OUTRO CONCELLO DA COMARCA

A Plataforma de afectados polas preferentes e subordinadas de O Salnés ampliará o peche que desde hai dez días manteñen en Sanxenxo, a un segundo concello da comarca. É unha das novas medidas de presión que emprenderán para intentar recuperar o seu diñeiro e que inclúe, estudar "accións máis drásticas" como a retirada de todos os seus fondos nas distintas oficinas das antigas caixas de aforro galegas.

"Queremos unha acción do Goberno xa para ter unha solución definitiva", sinalou o portavoz dos afectados de O Salnés-O Grove, José Manuel Vázquez, á vez que esixiu a implicación "dos alcaldes, dos presidentes das deputacións e do titular da Xunta de Galicia". Recordaron ademais, que "levamos 15 días sen arbitraxe e non imos permitir que pase unha xornada máis con esta incerteza".

Mentres, os aforradores de O Salnés forzaron o peche das sucursais que esta entidade bancaria posúe en O Grove e Sanxenxo. Os portavoces desta plataforma explicaron que con iso pretenden que o presidente de Novagalicia Banco dispense un trato igualitario a todos os afectados. Así, denuncian que José María Castellano citouse a semana pasada co grupo de O Morrazo "cando debería manter un encontro xeral a través da coordinadora das distintas plataformas para non ofrecer a ninguén un trato de favor".

Esperan, pois, que esta petición sexa atendida polo presidente da Deputación de Pontevedra, Rafael Louzán, de forma que na reunión que manterá co responsable de Novagalicia Banco "esteamos todos representados, e non só unha parte dos milleiros de afectados", co obxectivo de recuperar os seus aforros a través da arbitraxe ou outra fórmula que lles asegure o cobro efectivo.