Ao
igual que fai un ano, o balcón do noso Concello vólvese a encher de
cor, dignidade, alegría, loita, compañeirismo, liberdade e respecto.
Volvemos a facer que este balcón se encha de orgullo, como símbolo dun
Cambados aberto e plural, dun Cambados de todas e de todos.
O
28 de xuño conmemóranse en todo o mundo as revoltas de Stonewall no
1969, un acontecemento histórico que marcou o nacemento do movemento de
liberación gai, lésbico, transexual, bisexual e intersexual, e que se
celebra internacionalmente como o día do Orgullo LGTBI. Esta
conmemoración naceu da rebelión cidadá contra a inxustiza, a
discriminación, o hostigamento e a constante persecución social e
policial á que se sometía a unha parte da cidadanía, dando orixe a un
movemento polos dereitos civís e os dereitos sexuais en todo o mundo.
O
camiño iniciado aquel 28 de xuño logrou importantes avances. Sen
embargo, queda aínda moito camiño por percorrer ata alcanzar o obxectivo
da igualdade plena e da convivencia na diversidade, unha causa que
enriquece a toda a sociedade.
Por
eso, neste 2016, declarado ano da visibilidade bisexual na diversidade,
temos que facer visibles as reivindicacións do colectivo LGTBI. Esta
visibilidade é máis necesaria que nunca, xa que os dereitos conquistados
corren o risco de perderse, e para evitar este retroceso é necesaria
unha sociedade que asuma estes dereitos non como algo que pertence só a
un determinado colectivo senón como algo que é de todos e todas. Só así
se rematará co rexeitamento e a discriminación á que se ven sometidas
moitas persoas polo feito de vivir conforme ao seu sentir, e non
conforme aos dictados dunha sociedade heteronormativa e patriarcal que
castiga a quen se sae da súa norma, amparada polo silencio cómplice
dunha grande parte da poboación.
Sucesos
como o recente atentado perpetrado en Orlando, ante o que expresamos a
nosa máis enérxica condena, son a proba de que a intolerancia todavía
está moi presente. A sociedade enteira debe camiñar unida na procura dun
mundo no que ninguén se sinta inseguro e perseguido. Lembramos tamén
que aínda hoxe en 78 países do mundo se considera un delicto a
homosexualidade, que é castigada con penas que incluso chegan á pena de
morte. Por eso facemos un chamamento á comunidade internacional para que
actúe de maneira enérxica e decidida para rematar con este tipo de
atrocidades.
Un
dos factores clave para acadar este propósito da convivencia en
igualdade é a educación. Por eso denunciamos que prácticamente a metade
dos adolescentes LGTBI sofren a diario acoso nos centros escolares, e
que a maioría non recibiron a axuda axeitada. Debemos loitar para que os
centros escolares sexan espazos seguros para o alumnado LGTBI, nos que
debe existir unha formación e uns protocolos para o profesorado que
permitan abordar a diversidade sexual, familiar e de xénero, facendo que
a realidade LGTBI entre en positivo en tódalas escolas e institutos,
así como en todos os espazos de educación e ocio, para ensinar ás novas
xeracións a pluralidade do xénero humano, superando o binarismo e a
visión heterocentrista.
Para
que éstas reivindicacións se vexan realizadas, animámosvos a que esta
cor, esta loita e esta liberdade representadas hoxe aquí non queden só
neste balcón, que non queden só no 28 de xuño, senón que todas e todos
axudemos a expandir este orgullo polo mundo durante todos os días do
ano!
No hay comentarios:
Publicar un comentario
NON SE PUBLICARÁN COMENTARIOS ANÓNIMOS. SI O COMENTARISTA QUERE PERMANECER NO ANONIMATO, NON SE PUBLICARÁ O NOME.